Шак1охэр зэк1э п1оми хъунэу апэрэ осым аш1уабэ даш1эу ежэх. Аш1э ос телъы зыхъук1э лэучэц1ымэ ауж пфынк1э, ахэр зыдэщы1эр къэбгъотынымк1э лъэшэу нахь псынк1э зэрэхъурэр. Ары Пщымафэ ятэу Исмахьилэ пчэдыжьым жьэу унэм къызек1ым осым ч1ыгур зэфэдэу зэлъибгъагъэу зелъэгъум зык1эгуш1уагъэр.

Псынк1эу шак1о зэрэк1ощтым зыфигъэхьазырыныр ригъэжьагъ: хьэр ыгъэшхагъ, шкончыр ык1и щэпхъыхэр зы ч1ып1э ыш1ыгъэх, Пщымафи елбэтэу къыгъэущыгъ, шак1о зэрэк1ощтыхэр ри1уагъ.

Гуш1ом хэтэу к1алэм гу1эзэ зитхьак1ыгъ, ихьап-щыпыхэу ищык1агъэхэр ыгъэхьазырыгъэх, шхончыри патронхэри къы- штагъэх.

Ятэрэ ежьырырэ зэгъусэхэу хьэр ауж итэу 1эгум къыдэк1ыхи губгъэ лъэныкъом фаузэнк1ыгъ.

Дунаир дэхагъэ: тыдэ уплъагъэми фыжьыгъэ, чъыгыхэм сэхъым сурэт зэфэшъхьаф дахэу апиш1ахьыгъэмэ уяплъы зэпыты пш1оигъуагъ. Ау шак1охэмэ ахэр аш1о1офыгъэп, нахьыбэу ана1э зытетэу зылъыплъэщтыгъэхэр лэучыц1 ужхэр ары. Ары шъхьае шъофым осы къесыгъак1э зыхъук1э мэзым лэучэц1ыхэр нахь щэхъыех. Шак1омэ ар дэгъоу аш1эти, мэзым псынк1эу ек1угъэх.

Къызесырэ ужым апэу къежьэрэмэ ащыщ бэджэжъыер. Ащ ыуж гъэхъунэ ц1ык1ухэр зэпичыгъэу алъэгъугъ. Ужым игъэпсык1эк1э ар цыгъомэ зэряшэрэр пш1энэу щытыгъ ык1и зэрэужыжъэри гъуащэщтыгъэп: хьэми ары зык1имыштагъэри.

Бэджэжъыем ыуж зэрафэзэ, ош1э-дэмыш1эу тхьак1умк1ыхьэ ц1ык1ур пхъэчыпэ зэхэлъхэм къахэлъэтыгъ. Хьэм гу1эзэ ащ ыуж зыридзагъ. Бэрэ пэмытэу къыригъэгъэзагъ. Тхьак1умк1ыхьэр ыуж къырэк1ожьы. Юалэм ыпэ ар къифи еуагъ, ау 1эк1эк1ыгъ, тыригъэфагъэп. "А сикъощэ тхьамык1, а къаорэр к1алэр арэп, л1ыжъыр ары нахь" ы1озэ щэр лъэбыщэм лъит1упщыгъ. Цыхэр къыхыригъэхыгъ, ежьыри л1ыжъым ыпашъхьэ ук1орэеу къифагъ. Джащ фэдэу апэрэ осым шак1охэр ыгъэгуш1уагъэх.