"Гъогурык1ор гъогу тенэрэп" а1уагъэми, сыхьатит1ум ехъугъэу зыдежьагъэм Саидэ нэсын ылъэк1ыщтыгъэп. Автобусхэм язэпыугъон фае, къэлъагъохэрэп. Машинэ псынк1эхэр арых блэлъэтыхэрэр. Ахэмэ ы1э афи1этырэп: уизакъоу зыщыщ умыш1эрэм удит1ысхьэ хъуна. Загъорэ гъуахъохэу машинэшхо- хэр блэчъыщтыгъэх. Жьэу ахэмэ къапык1ырэм иджэнэ 1эпак1э зырихьыжьэк1э, Саидэ гу1эзэ ыгъэ1эсэжьыщтыгъэ.

Пшъашъэр гумэк1эу зэрэщытым гу лъытэгъоягъэп. Ар зэхиш1эу ш1у щэхъу ыгу имылъэу машинэр къыфэзыгъэуцугъи къахэк1ыгъ, ау хъулъфыгъэ шъхьэзакъом дит1ысхьаныр рикугъэп. "Цыхьэш1эгъоу щымытым уизакъоу удимыт1ысхь" - янэ къызыри1огъагъэм щэгъэжьагъэу а унашъоу къыфаш1ыгъэм дэхыщтыгъэп.

/Къуекъо Асфар/